لكل مدير فى مكانه، قاعدة Tell.. Sell.. Involve

لو حضرتك مدير ولما تيجى تاخد قرار فابتتعامل مع كل أفراد فريقك بنفس الأسلوب، يبقى حضرتك غلطان.

متفهمين جدًا إن القرار ده بيكون للمصلحة العامة، وفائدته هاتعود على الناس كلها.. بس تقبل أفراد فريقك للقرارات بيكون مختلف. وده لاختلاف خبراتهم وأقدميتهم ومستوى وعيهم برؤية وأهداف الشركة.

وعليه.. وجب اختلاف طريقة تعاملك مع أفراد فريقك على ٣ مستويات مختلفة من التعامل:

* المستوى الأول Tell
وهو بيكون للتعامل مع أعضاء فريقك حديثي التعيين/ حديثى الخبرة، وفيه حضرتك بتقول لهم القرار وطريقة تنفيذه بتكون إزاى.. مش مطلوب منك أكتر من كده.

* المستوى الثانى Sell
وبيكون طريقة التعامل مع أفراد الفريق الأقدم شوية (Seniors) واللى بيكون لهم مسئوليات قيادية داخل الفريق.
بيكون مطلوب من حضرتك (بيع) فكرتك أو قرارك لهم، يعنى بتقول لهم ايه القرار ده، وايه فايدته، وإيه العائد اللى هايعود عليهم وعلى الشركة من تنفيذ هذا القرار.

* المستوى الثالث Involve
وده مستوى الوحش..
فدايمًا بتلاقى عندك فى الفريق واحد أو اتنين بالكتير أوى بتكون خبراتهم عالية جدًا، أقدميتهم كبيرة، وعلى الأقل واحد فيهم هو successor ليك، وعندهم مهارات قيادية عالية، وباقى الفريق بيكنوا لهم احترام كبير.
الناس دى لازم تُشركهم فى اتخاذ القرار من البداية، ولازم تاخد بمقتراحتهم فى جدوى القرار من عدمه، أو هل هو مناسب فى الفترة دى ولا لأ، وكمان فى طريقة تنفيذه.

الكلام ده بيحافظ على كفاءة اتخاذ القرارات داخل منظومة العمل، كمان بيسهل طريقة تنفيذ القرارات وإمكانية متابعتها.